PARTICIPACIÓN XUVENIL

O CONCELLO DE VIVEIRO ACOLLE AS DÚAS PRIMEIRAS PROPOSTAS DO GRUPO DE PARTICIPACIÓN XUVENIL

Viveiro, 24 de xaneiro de 2022. O Concello de Viveiro informa da celebración da cuarta sesión do grupo de Participación Viveiro Xoves, celebrada o pasado venres 14 de xaneiro de 2022 no IES Vilar Ponte.

O grupo continúa medrando, coa incorporación de seis novos rapaces e rapazas nesta última sesión. Nesta reunión do pasado venres, os menores, ademais de coñecerse e divertirse, deseñaron dúas actividades que xa contan coa autorización do Equipo de Goberno para ser realizadas no municipio.

A primeira delas, con motivo do entroido, será un Scape Room sobre os Dereitos da Infancia, que terá lugar o luns 28 de febreiro no pavillón do IES Vilar Ponte. A segunda será unha iniciativa relacionada co 8M, día Internacional da Muller Traballadora, na que o grupo deseñou tarxetas violetas con frases reivindicativas e feministas.

Nesta iniciativa, a súa intención consiste en suxeitar cuns lazos da mesma cor estas mensaxes, feitas por elas e eles mesmas/os, en diferentes espazos do municipio, coa intención de que todo o mundo as poida ler. Asemade, como exemplo para a cidadanía, o grupo comprometeuse a recoller todas as tarxetas unha vez finalice o día, como signo de respecto polo mantemento da orde e limpeza dos espazos públicos.

A próxima sesión celebrarase o vindeiro mércores 2 de febreiro de 16:30 a 18:30 na Sala Multiusos do Concello.

Saúdos,

Comunicación Concello de Viveiro