RENOVACIÓN PADRÓN MUNICIPAL

O CONCELLO DE VIVEIRO MODERNIZARÁ O SEU PADRÓN MUNICIPAL PARA FACILITAR OS TRÁMITES ADMINISTRATIVOS AOS VECIÑOS

Viveiro, 11 de decembro de 2024. O concelleiro Jesús Fernández, en representación do Concello de Viveiro, asinou un convenio de colaboración coa Deputación de Lugo para modernizar o padrón municipal.

“O padrón municipal é un rexistro administrativo de gran importancia, dado que a inscrición no mesmo supón un requisito previo e imprescindible para o acceso dos veciños ao uso e desfrute de servizos públicos como educación, sanidade e servizos sociais no municipio, así como ao exercicio do dereito de sufraxio ou participación cidadá”, explica Fernández.

Polo anterior, a sinatura deste convenio para o proxecto coñecido como “Xeopadrón”, resulta de vital valía para o desenvolvemento dun sistema informático moderno e actualizado, que permita que o Concello de Viveiro se poida comunicar en tempo real co Instituto Nacional de Estatística, de xeito que posibilite a corrección de discrepancias e o mantemento dunha base de datos máis depurada.

Así mesmo, a incorporación da referencia catastral, ou código de vivenda equivalente, ao padrón municipal de habitantes, suporá unha mellora na localización dos domicilios, así como na formación e actualización do rueiro municipal.

Ademais, o mantemento dun censo de vivendas, a parte do censo de habitantes, posibilitará a implantación de políticas de vivenda no municipio, unha vez estudados os datos de situación actual da vivenda no concello.

Saúdos, Comunicación Concello de Viveiro